👉በአሰልጣኝ ሃይሉ ነጋሽ /ቲጋና/ ክስ ሲበየንበት
👉በሊጉም በሲዳማ ቡና ሽንፈት ገጥሞታል
የኢትዮጵያ እግርኳስ ፌዴሬሽን የዲሲፕሊን ኮሚቴ ፋሲል ከነማ የቀድሞ አሰልጣኙ ሃይሉ ነጋሽ /ቲጋናን/ ወደ ስራ እንዲመልስ ይህ የማይሆን ከሆነ እስከ ውላቸው ማለቂያ ድረስ ያለው ቀሪ ደመወዛቸውን እንዲከፍል ወሰነ።
ኮሚቴው ከሁለቱ ወገኖች የቀረበለትን የክስ ሂደትና ምላሽን ሲመረምር ከቆየ በኋላ ባለፈው ሳምንት የመጨረሻ ያለውን ብይን ሰጥቷል…. “ክለቡ አሰልጣኙን ሲያሰናብት የዲሲፕሊን መመሪያውን አልጠበቀም በቂ የስህተት ማረሚያ ጊዜ አልሰጠም ፤ አሰልጣኙ ውሉን ሳያቋርጥ የተሰናበተው በክለቡ በመሆኑ የፊርማ ክፍያውን እንዲመልስ የሚገደድበት የዲሲፕሊን መመሪያም ሆነ ውላቸው ውስጥ የተካተተና ብሩን እንዲመልሱ የሚገደዱበት አንቀፅ የለውም ፤ በአጠቃላይ የአሰልጣኙ ስንብት የውል ስምምነቱን ጠብቆ የተሰጠ አይደለም” ሲል ዘርዘር ያለ ሂደቱን አብራርቷል።
የክለቡን ጥያቄ ውድቅ ያደረገው የዲሲፕሊን ኮሚቴ በዲሲፕሊን መመሪያው አንቀፅ 86/ሀ መሰረት በሰጠው ብይን ” ክለቡ ቀሪ የአሰልጣኙን ደመወዝ እንዲከፍል አሰልጣኙን ወደስራ ገበታቸው እንዲመልስ ይህ የማይሆን ከሆነ እስከ ውላቸው የመጨረሻ ቀን ድረስ ያለውን ደመወዛቸውን እንዲከፍል ውሳኔውንም በ7 ቀን ውስጥ እንዲፈፅም” ሲል አዟል።
እንደ ኮሚቴው ውሳኔ “የተሰጠውን ብይን በተባለው ቀን ተግባራዊ ካላደረገ ከተጨዋች ምዝገባና ዝውውር እንዲታገድ ከፌዴሬሽኑ ጽ/ቤትም ምንም አይነት ግልጋሎት እንዳያገኝ ጽ/ቤቱም ውሳኔውን ለሚመለከታቸው አካላት ውሳኔውን እንዲደርሳቸው እንዲያደርግ ወስኗል ይግባኝም መብት ነው” ሲል ውሳኔውን ይፋ አድርጎታል።
ይህ በእንዲህ እንዳለ በ25ኛው ሳምንት የኢትዮጵያ ፕሪሚየር ሊግ ፋሲል ከነማ ደስታ ደሙ በሁለተኛው ደቂቃ ላይ ባስቆጠረው ግብ በሲዳማ ቡና 1ለ0 ተሸንፏል በውጤቱም የአሰልጣኝ አሸናፊ በቀለ ፋሲል ከነማ በ37 ነጥብ 4ኛ ደረጃ ላይ ሲገኝ የአሰልጣኝ ስዩም ከበደ ሲዳማ ቡና ከወራጅ ቀጠና በመውጣት በ33 ነጥብ 10ኛ ደረጃን ይዟል።
የ2015 የኢትዮጵያ ፕሪሚየር ሊግ ሊጠናቀቅ ከነገ 24ኛ ሳምንት ሁለት ጨዋታዎች በስተቀር ሁሉም ክለቦች አምስት አምስት ጨዋታ ይቀራቸዋል።
አስተያየት ይስጡ