አቶ አሊሚራህ መሀመድና አቶ ገዛኸኝ ወልዴ ከምርጫ ውጪ ሆኑ

የኢትዮጵያ እግርኳስ ፌዴሬሽን አስመራጭ ኮሚቴ ከተወሰነ ደቂቃዎች በኋላ ይፋ በሚያደርገው የተወዳዳሪ ዕጩዎች ስም ዝርዝር ውስጥ የአቶ አሊሚራ መሀመድና የአቶ ገዛኸኝ ወልዴ ስም እንደማይኖር ተረጋገጠ።

ከፌዴሬሽኑ ታማኝ ምንጭ በተገኘ መረጃ በአቶ ሳህሉ ገ/ወልድ፣ በአቶ ጁነዲን ባሻና በአቶ ኢሳያስ ጅራ የፕሬዝዳንትነት ዘመን ባለፉት 12 አመታት በስራ አስፈጻሚነት የሰሩት የአፋሩ አሊሚራህ መሀመድ ከምርጫ ውጪ ሆነዋል። ኮሚቴው በተከታታይ ሶስት አመት ይሁን በተለያየ ጊዜ የሰራ አይካተትም በሚለው አቶ አሊሚራህን ከውድድሩ ውጪ አድርጓል።

ኮሚቴው በተጨማሪ የሀረሪ ክልል ለአቶ ገዛኸኝ ወልዴ የሰጠውን ውክልና ማንሳቱን ተቀብሎ አቶ ገዛኸኝን ከፕሬዝዳንታዊ ምርጫ ውጪ አድርጓቸዋል። አቶ ገዛኸኝ ክልሉ ውክልናዬን ማንሳት አይችልም ቢሉም ኮሚቴው በተቀመጠው ህግ ክልሉ ውሳኔውን የመሻር መብት አለው ብሎ የአቶ ገዛኸኝ ውክልናን ውድቅ አድርጎታል።

ሁለቱም ዕጩዎች ከዛሬ ጀምሮ በአቶ አንበሳው እንየውና በአቶ ብርሀኑ ከበደ ለሚመራው ይግባኝ ሰሚ ኮሚቴ ይግባኝ የመጠየቅ መብት አላቸውም ተብሏል።