በረከት ደስታ በሰርግ ምክንያት ከዋሊያዎቹ ተሰናብቷል

*በረከት ደስታ በሰርግ ምክንያት ከዋሊያዎቹ ተሰናብቷል

* ፍቃድ አግኝቶ ወጥቶ ባለው ጊዜም አለመመለሱ ከቡድኑ የመቀነሱ ምክንያት ሆኗል

የዋሊያዎቹ አሰልጣኝ ውበቱ አባተ ከመረጣቸው 36 ተጨዋቾች ሽመልስ በቀለን ጨምሮ ከቀሩት 27 የቡድኑ አባላት መሃል የተጨዋቹ ስም አለበት፡፡

ከ27 ተጨዋቾች 4ቱ የሚቀነሱ በመሆኑ በረከት ከተቀናሾቹ መሃል ይሁን አይሁን የታወቀ ነገር አልነበረም ትልቅ አገራዊ አጀንዳ ላይ የተጠራው ተጨዋቹ ግን ከሰአታት በፊት በደረሰኝ መረጃ በሰርግ ምክንያት ከካፍ አካዳሚ ከሚገኙት ተጨዋቾች ውጪ ሆኗል፡፡

መጀመሪያውኑስ የተቀነሱት ተጨዋቾች ዝርዝር ከመታወቁ በፊት ተናግሮ ቢሆን ኖሮ በሱ ቦታ ከተቀነሱት ተጨዋቾች አንዱ ይቀር ነበር በማለት የበረከትን ድርጊት የስፖርት ቤተሰቡ ተችቷል፡፡ ቡድኑ ህዳር 4 ኒጀርን ገጥሞ የሚመለሰው ህዳር 6 ሲሆን ይህም ቀን የበረከት የሰርጉ ቀን መሆኑ ታውቋል፡፡

ከታማኝ ምንጭ በተገኘ ሌላ የበረከት መረጃ ሰኞ ዕለት ወደ አዳማ ሄዶ ማክሰኞ ምሽት 12 ሰአት ለመመለስ በአሰልጣኝ ውበቱ አባተ ፍቃድ አግኝቶ ከአካዳሚው ከወጣ በኋላ በተባለው ሰአት ባለመመለሱ አሰልጣኙ ደጋግሞ በእጅ ስልኩ ላይ ቢደውልም በረከት ምላሽ አለመስጠቱ አሰልጣኙን አበሳጭቷል፡፡

ተጨዋቹ ዛሬ ጠዋት ሲደውል በአሰልጣኙ መመለስ እንደማይችል መቀነሱ እንደተነገረውና በዚህ የዲሲፕሊን ጥሰትም ከቡድኑ መባረሩ ታውቋል፡፡

ከዚህም በላይ ወጥቶ አድሮ መመለሱ የኮቪድ ምርመራ የግድ በመሆኑም ጭምር በረከት እንዲሰናበት አድርጎታል፡፡ ሰርግ እያለበት እውነቱን አለመናገሩ ምናልባት ኒጀርን አሸንፈው በድል ሲመለሱ ቦሌ አውሮፕላን ማረፊያ ቀለበቱን ለማድረግ አስቦ ይሆን? የሚሉ ወገኖችም አልጠፉም፡፡

ምናልባት ሲደወልለት ያላነሳው ከ27ቱ ቀሪ ተጨዋቾች መሃል እሆናለሁ የሚል እምነትም ስላልነበረው ይሆናል የሚልም ግምት አለ፡፡ ዋሊያዎቹ በቀናቶች ውስጥ ደግሞ ቀሪዎቹ አንድ ግብ ጠባቂና ሁለት ተጨዋቾች ቀንሰው ጠንካራ ልምምዳቸውን ይቀጥላሉ ተብሎ ይጠበቃል፡፡

Editor at Hatricksport

Facebook

ዮሴፍ ከፈለኝ

Editor at Hatricksport