የጨዋታ ዘገባ | ሲዳማ ቡና ከአዳማ ከተማ አቻ ተለያይተዋል

ሲዳማ ቡና በአምስተኛ ሳምንት ጨዋታ ከተጠቀሙት ቋሚ 11 ዳዊት ተፈራን ብቻ በመቀየር ያስገቡ ሲሆን በአንፃሩ አዳማ ከተማዎች ከአዲስ አበባ ከተማ ጋር አቻ በተለያዩበት ጨዋታ ከተጠቀሙት ቋሚ አሰላለፍ ዮሴፍ ዮሀንስ ፤ አሜ መሀመድ እና አብዲሳ ጀማልን ቀይረው በማስገባት ጨዋታቸውን ጀምረዋል ።

የሁለቱ ክለቦች ጨዋታ ግብ ለማስተናግድ 3 ደቂቃዎች ብቻ ነበር የፈጁበት ። ሀብታሙ ገዛኸኝ ከማዕዘን ያሻማውን ኳስ ተጠቅሞ ግርማ በቀለ ሲዳማ ቡናን መሪ ያደረገ ግብ አስቆጠረ ። ከግቧ መቆጠር በኋላ አዳማ ከተማዎች የጨዋታ ብልጫ በመውሰድ መጫወት ችለዋል በአንፃሩ ሲዳማ ቡናዎች በመልሶ ማጥቃት ለመጫወት ሙከራዎችን አድርገዋል ።

በፈጣን እንቅስቃሴ ወደ ግብ ሲደርሱ የነበሩር አዳማ ከተማዎች የግብ ዕድሎችን በመፍጠር ረገድ 23 ደቂቃዎችን ለመጠበቅ ተገደዋል ። በደቂቃው ላይ አማኑኤል ጎበና ከሳጥን ውጪ የመታውን ኳስ ወደ ግብ ሲሞክረው የግቡ ቋሚ መልሶበት ወዲያው ያገኘው አቡበከር ወንድሙ በድጋሚ ወደ ግብ ቢሞክረውም በተክለማርያም ሻንቆ በቀላሉ ተይዞበታል ። ጫና ማድረጋቸውን የቀጠሉት አዳማ ከተማዎች 32ኛ ደቂቃ ላይ አቻ የሚያደርጋቸውን ግን አገኙ ። ሚሊዮን ሰለሞን ከማዕዘን ምት ያሻማውን ኳስ አማኑኤል ጎበና በግንባር በመግጭት አስቆጠረ ። በቀሩት የመጀመሪያ አጋማሽ ደቂቃዎች ሲዳማ ቡና በተሻለ ወደ ግብ ቢያመሩም ተጨማሪ ግብ ሳያስቆጥሩ የመጀመሪያው አጋማሽ ተጠናቋል ።

በሁለተኛው አጋማሽ ጨዋታው ቀዝቀዝ ብሎ የታየበት ነበር ። በሁለቱም በኩል በተወሰኑ አጋጣሚዎቾ ወደ ተጋጣሚ የግብ ክልል ለመድረስ የሚደረጉ ጥረቶች ቢታዩም የግብ ሙከራዎችን ግን በቀላሉ ማድረግ አልቻሉም ።

በጨዋታው የመጨረሻ ደቂቃዎች ላይ ግን ቀደም ብሎ ከነበረው የተሻለ እንቅስቃሴ በሜዳ ላይ የታየ ሲሆን ከሁለቱም በኩል የአሸናፊነቱን ግብ የሚያስቆጥር ተጫዋች ማግኘት ሳይቻል ጨዋታወሰ በአቻ ውጤት ተጠናቋል ።

ውጤቱን ተከትሎም ከጨዋታው በፊት በእኩል ስድስት ነጥብ ላይ የነበሩት ሁለቱ ክለቦች ነጥባቸውን ሰባት ሰባት አድርሰዋል ።