በአቤኔዘር አበበ
በሀዋሳ ዩኒቨርሲቲ ስታዲየም በተደረጉ የፕሪምየር ሊጉ ጨዋታዎች መቻል ሀዋሳ ከተማን ኢትዮጵያ ንግድ ባንክ ደግሞ ሲዳማ ቡናን በደጋፊዎቻቸው ፊት ረተዋል።

በሀዋሳ ከተማና መቻል መካከል በተደረገው ጨዋታ ደካማ እንቅስቃሴ በታየበት የመጀመሪያ አጋማሽ ሀዋሳ ከተማ በጌታነህ ከበደ አማካኝነት ከቆመ ኳስ ዒላማውን የጠበቀ አንድ ሙከራ ሲያደርግ፣ መቻል ዒላማውን የጠበቀ ሙከራ ሳያደርግ ወደ ዕረፍት አምርቷል።
በሁለተኛው አጋማሽ መቻል በመሐል ሜዳ ቁጥጥር ላይ የበለጠ ብልጫ በማሳየት ጨዋታውን ተቆጣጥሯል። የሁለቱም አሰልጣኞች ቅያሪዎች በጨዋታው ላይ ተጽዕኖ ቢፈጥሩም፣ በ84ኛው ደቂቃ ቢንያም ተክሉ ያስቆጠራት ግብ ለመቻል የ1 ለ 0 ድልን አስገኝታለች።
በሌላ ጨዋታ ሲዳማ ቡና ከኢትዮጵያ ንግድ ባንክ ጋር ተገናኝቷል። በመጀመሪያው አጋማሽ በተደጋጋሚ ፋውሎች በታዩበት ጨዋታ፣ የሲዳማ ቡና ተጫዋቾች ያሬድ ባዬ እና መስፍን ታፈሰ በጉዳት በ13ኛው ደቂቃ ተቀይረው ከሜዳ ወጥተዋል።
በ43ኛው ደቂቃ ሄኖክ ኤርሚያስ የሲዳማ ቡናን የመከላከያ ክፍል አለመናበብ ተጠቅሞ ለኢትዮጵያ ንግድ ባንክ የድል ግብ አስቆጥሯል። በሁለተኛው አጋማሽ ሲዳማ ቡና ጫና ፈጥሮ በተደጋጋሚ ወደ ግብ ቢደርስም፣ ሙከራዎቹን ወደ ግብነት መቀየር ተስኖት በአንድ ግብ ልዩነት ተሸንፏል።
የጨዋታዎቹ ውጤት
ሀዋሳ ከተማ 0–1 መቻል
ሲዳማ ቡና 0–1 ኢትዮጵያ ንግድ ባንክ
አስተያየት ይስጡ