ቡናማዎቹ ጦሩን ሲረቱ ኢትዮጵያ ንግድ ባንክ በዓመቱ ለሶስተኛ ጊዜ አሸንፏል

ኢትዮጵያ ቡና እና ኢትዮጵያ ንግድ ባንክ ተጋጣሚዎቻቸውን ረተዋል

በሲቢኢ የኢትዮጵያ ፕሪሚየር ሊግ የ12ኛ ሳምንት የመጨረሻ ሁለት ጨዋታዎች በዛሬው ዕለት ሲደረጉ ኢትዮጵያ ቡና እና ኢትዮጵያ ንግድ ባንክ ተጋጬሚዎቻቸውን አሸንፈዋል።

በአዲስ አበባ ስታድየም በተካሄደው እና የአሰልጣኝ ለውጥ አድርጎ በምክትል አሰልጣኙ እየተመራ የቀረበውን ኢትየጵያ ቡና ከመቻል ያገናኘው ጨዋታ በቡናማዎቹ የ1 ለ 0 አሸናፊነት ተጠናቋል።

በመጀመሪያዎቹ 30 ደቂቃዎች ላይ የሙሉጌታ ምህረቱ መቻል ጫና በመፍጠር ደጋግሞ ወደ ኢትዮጵያ ቡና የግብ ክልል ለመድረስ ጥረቶችን አድርጓል።

የመቻል ተደጋጋሚ የማጥቃት እንቅስቃሴ ጠንከር ባለ የግብ ሙከራዎች ለመታጀብ እስከ 23ኛው ደቂቃ መጠበቅ የግድ ብሎ ነበር።

በተጠቀሰው ደቂቃ ላይ ፈቱዲን ጀማል ከማዕዘን የተሻገረን ኳስ በግንባር በመግጨት ያደረገው ሙከራ ግብ ጠባቂውን ቢያልፍም ናትናኤል ፍሬው ኳሱን አውጥቶታል።

በተመሳሳይ በ29ኛው ደቂቃ ላይም ከማዕዘን በተሻገረ ኳስ ታውላ ቴዎፎል በግንባር ገጭቶ ያደረገውን ሙከራ ሚኪያስ ፀጋዬ አውጥቶታል።

ከጨዋታውን መጀመር ግማሽ ሰዓት በኋላ ወደ መቻል የግብ ክልል በአደገኛ አጋጣሚዎች መድረስ የቻሉት ቡናማዎቹ በ33ኛው ደቂቃ ላይ በዘላለም አባተ አማካይነት ያደረጉት ሙከራ በግቡ አግዳሚ ተመልሷል።

የጨዋታው የመጀመሪያ አጋማሽ ሊጠናቀቅ አንድ ደቂቃ ብቻ ሲቀረውን ግን ኢትዮጵያ ቡናዎች ግብ አግኝተዋል።

የአቡበከር አዳሙ ድንቅ ብቃት በታየበት እንቅስቃሴ ሁለት የመቻል ተከላካዮች አልፎ በመሄድ ለዲቫይን ዋቹኩዋ ያቀበለው ኳስ ከመረብ ላይ አርፏል።

በሁለተኛው አጋማሽ መቻሎች የአቻነቱን ግብ ለማግኘት ደጋግመው ወደ ቡናማዎቹ ሳጥን መድረስ ቢችሉም ኳስን እና መረብን ማገናኘት ዳገት ሆኖባቸዋል።

በ52ኛው ደቂቃ ላይ አብድልከሪም ወርቁ እንዲሁም ቸርነት ጉግሳ በ72ኛው ደቂቃ ላይ ያደረጓቸው ኢላማቸውን የጠበቁ ሙከራዎች በእንዳሻው እሸቴ በቀላሉ ተይዘዋል።

መነሻቸውን ከመስመር ባደረጉ ኳሶች ተደጋጋሚ የማጥቃት አጋጣሚዎችን ለመፍጠር የሞከሩት መቻሎች ይህን እንቅስቃሴ ለማጠናከር ሁለቱንም የመስመር ተከላካዮች በመቀየር ጭምር ግብ ለማስቆጠር ጥረዋል።

በኢትዮጵያ ቡና በኩል ከኳስ ጀርባ በቁጥር በዝተው በመገኘት የሚነጠቁ ኳሶችን በፈጣን ሽግግር እና በረጃጅም ኳሶች ተጨማሪ ግቦች ለማስቆጠር ሞክረዋል።

በተለይም በ84ኛው ደቂቃ ላይ አራት የቡናማዎቹ ተጫዋቾች ከሁለት የመቻል ተጫዋቾች ጋር ተገናኝተው ሳይጠቀሙበት የቀረው ዕድል አስቆጪ ነበር።

ግለት በነበረው የጨዋታው የመጨረሻ ደቂቃዎች ላይ መቻሎች በተለይም በ86ኛው ደቂቃ ላይ በቸርነት ጉግሳ እና አብዱልከሪም ወርቁ ያደረጓቸው ሙከራዎች በኢትዮጵያ ቡና ተከላካዮች ተመልሰዋል።

ውጤቱንም ተከትሎ ኢትዮጵያ ቡና ነጥቡን 15 ያደረሰ ሲሆን መቻል በበኩሉ በ20 ነጥብ ላይ ለመቆየት ተገዷል።

በአዳማ ሳይንስና ቴክኖሎጂ ዩኒቨርስቲ ስታድየም የ2016 እና የ2017 ሻምፒዮኖቹን ባገናኘው ጨዋታ ኢትዮጵያ ንግድ ባንክ ኢትዮጵያ መድን 2 ለ 1 አሸንፏል።

በጨዋታው የረመዳን የሱፍ የ22ኛ ደቂቃ ግብ ኢትዮጵያ መድንን እስከ 50ኛው ደቂቃ ድረስ መሪ አድርጎ ነበር።

ነገር ግን በሁለተኛው አጋማሽ ናትናኤል ዳንኤል በ51ኛው ደቂቃ ላይ ግብ አስቆጥሮ ኢትዮጵያ ንግድ ባንክን አቻ አድርጓል።

ከ11 ደቂቃዎች በኋላ ደግሞ አምበሉ አዲስ ግደይ ያስቆጠረው ግብ የበፀሎት ልዑልሰገዱን ቡድን አሸናፊ አድርጓል።

ውጤቱንም ተከትሎ ኢትዮጵያ ንግድ ባንክ ነጥቡን 15 ሲያደርስ ኢትዮጵያ መድን በበኩሉ 13 ነጥብ ላይ ለመቆየት ተገዷል።

በ13ኛው ሳምንት ኢትዮጵያ ቡና ከምድረ ገነት ሽረ እንዲሁም መቻል ከነገሌ አርሲ ጋር ጨዋታቸውን ያደርጋሉ።