በተጫዋቾች የክፍያ ጣሪያ ላይ አዲስ ውሳኔን ለማሳለፍ የፊታችን ዕሁድ ውይይት ይደረጋል።
የኢትዮጵያ ፕሪምየር ሊግ አክሲዮን ማህበር የክለቦችን የተጫዋቾች የክፍያ ጣሪያን ከፍ ለማድረግ አልያም ደግሞ ገደቡን ሙሉ በሙሉ ለማንሳት ከክለቦች ጋር ውይይት ለማድረግ በቀጣዩ ሳምንት ዕሁድ ሐምሌ 19/2018 ቀጠሮ መያዙን ሃትሪክ ስፖርት ያገኘው መረጃ ያመላክታል። ክለቦች ለተጫዋቾች የሚከፍሉትን ገንዘብ በተመጣጠነ መልኩ ተከትለው መክፈል አለባቸው በሚል በመጀመሪያ 56 ሚሊዮን በአመቱ ደግሞ ህጉ ተሻሽሎ 70 ሚሊዮን ብር የአንድ ክለብ አመታዊ በጀት እንዲሆን በመወሰን ወደ ስራ ቢገባም ክለቦች ህጉን ተፈፃሚ ከማድረግ አኳያ ግን ክፍተቶች ነበሩባቸው። የወጣውን ህግ በማይፈፅሙ ክለቦች ላይ ደግሞ ቅጣትን ለመጣል የፋይናንስ አጣሪ ኮሚቴ በማቋቋም ወደ ተግባር ቢገባም አክሲዮን ማህበሩ ግማሹን ቀጥቶ ገሚሱን በዝምታ ማለፉ በርካቶችን እንዳሳዘነ ይታወሳል።

ይህንን ጉዳይ ለአንዴ እና ለመጨረሻ ጊዜ መፍትሄ ለማበጀት ትላንት ዕሁድ ሐምሌ 12 የፕሪምየር ሊጉን ክለቦች በመጥራት የፋይናንስ ገደቡ ይነሳ ወይም የገንዘብ መጠኑ ከፍ ይበል በሚለው ጉዳይ ለመወያየት አቅዶ የነበረ ቢሆንም የኢትዮጵያ እግር ኳስ ፌድሬሽን አቶ ኢሳያስ ጂራ ለአለም ዋንጫ ፍፃሜ ወደ አሜሪካ በማምራታቸው ምክንያት ቀኑ በአንድ ሳምንት መገፋቱ ታውቋል።
አስተያየት ይስጡ