በፔሩ ሊማ በመካሄድ ላይ ባለው የዓለም ከ20 አመት በታች አትሌቲክስ ሻምፒዮና ኢትዮጵያ በመጀመሪያው ቀን አንድ የወርቅ እና ሁለት የብር ሜዳልያዎችን አሳክታለች።
በሴቶች 5 ሺህ ሜትር በተደረገው ውድድር አትሌት መዲና ኢሳ 14:39.71 በመግባት የውድድሩን ክብረወሰን በመስበር ጭምር አሸንፋለች።
የርቀቱ ክብረወሰን አስቀድሞ በአትሌት ገንዘቤ ዲባባ ተይዞ የነበረ ነው።
አትሌት መዲና ኢሳ በ2022 በኮሎምቢያ ካሊ በተደረገው የዓለም ከ20 ዓመት በታች ውድድርም በርቀቱ አሸናፊ ነበረች።
ይህም በዓለም ከ20 አመት በታች የአትሌቲክስ ሻምፒዮና በተከታታይ ያሸነፈች የመጀመሪያዋ ኢትዮጵያዊት እንድትሆን አሰችሏታል።
በውድድሩ አትሌት መቅደስ አለምሸት በ14:57.44 በሁለተኝነት በማጠናቀቅ የብር ሜዳልያ አስመዝግባለች።
በወንዶች በተደረገው የ5 ሺህ ሜትር የፍፃሜ ውድድር ደግሞ አትሌት አብዲሳ ፈይሳ በ13:41.56 በሁለተኝነት አጠናቋል።
በውድድሩ የተካፈለው ሌላኛው ኢትዮጵያዊ አትሌት ንብረት ክንዴ በ13:44.67 በስድስተኛ ደረጃ ውድድሩን ፈፅሟል።
በዚህም ኢትዮጵያ በሜዳልያ ሰንጠረዡ በአንድ የወርቅ እና ሁለት የብር በድምር ሶስት ሜዳልያዎች አንደኛ ላይ ተቀምጣለች።
አስተያየት ይስጡ