እውቁን የቀድሞ የሀገር ባለውለተኛና ድንቅ የአጥቂ ስፍራ ተጨዋችን አሰግድ ተስፋዬን/ጂሪየስ/ የአራተኛ ዓመት ህልፈትን አስመልክቶ በ8 ክለቦች መካከል ሲካሄድ የቆየው የመታሰቢያ እግር ኳስ ውድድር በዛሬው ዕለት ፍፃሜውን ያደረገ ሲሆን በዕለቱም በተደረገው ጨዋታ የኢትዮ-አፍሪካንና የአበበ ቢቂላ የጤና ቡድኖች በመደበኛው የጨዋታ ክፍለ ጊዜ ምርጥ የጨዋታ ፉክክርን ካደረጉ በኋላ ለኢትዮ-አፍሪካ አብዱራህማን መሀመድ /አቡሸት/

ለአበበ ቢቂላ ደግሞ ዳዊት ባሌማ ባስቆጠሯቸው ግቦች 1-1 ከተለያዩ በኋላ የሁለቱን ቡድኖች አሸናፊ ለመለየት በተሰጡት የፍፁም ቅጣት ምቶች ኢትዮ-አፍሪካ 5-4 በአጠቃላይ የጨዋታ ውጤት ደግሞ 6-5 በማሸነፍ የውድድሩ ሻምፒዮና ሆነዋል።

ኢትዮ-አፍሪካ ይህን ውድድር ለመጀመሪያ ጊዜ ሻምፒዮና የሆነበት ሲሆን ለመጀመሪያ ጊዜ የተደረገውን ውድድር ደግሞ የሻላ የጤና ቡድን ማሸነፉ ይታወሳል።
በኢትዮ-አፍሪካና በአበበ ቢቂላ የጤና ቡድኖች መካከል ዛሬ በተደረገው ጨዋታ 95ኛው ደቂቃ ላይ የአበበ ቢቂላው ግብ ጠባቂ ሄኖክ /ቤንዜማ/ ከኢትዮ-አፍሪካው አጥቂ አብዱራህማን ሙባረክ /ግሪዳው/ ጋር በመጋጨቱ ጠንከር ያለ የእግር ላይ ጉዳትን ያስተናገደ ሲሆን የመጀመሪያ ህክምናውንም በሜዳ ላይ ካስተናገደ በኋላም ወደ ሳሮን ሆስፒታል ተወስዶ ሄክምናውን እያደረገ ይገኛል።
የአሰግድ ተስፋዬ የመታሰቢያ እግር ኳስ ውድድር በዛሬው ዕለት ሲጠናቀቅም የኢትዮ-አፍሪካውያኖቹ ቢኒያም ሀይሌ በኮከብ ተጨዋችነት፣ ሚራጅ በኮከብ ግብ አግቢነት፣ ውብሸት ደሳለኝ በኮከብ ግብ ጠባቂነትና ሳሙሄል በኮከብ አሰልጣኝነት በመመረጥ ተሸላሚ ሆነዋል። የውድድሩን የስፖርታዊ ጨዋነት ሽልማት ደግሞ የኮተቤ የጤና ቡድን ሲወስድ ከዋንጫው በፊት በተደረገው የውድድሩ ማድመቂያ ጨዋታ ደግሞ በአሰልጣኝ ታምሩ ከበደ የሚመራው የዲጂዎች ቡድን የስፖርት ጋዜጠኞችን ቡድን 3-0 በማሸነፍ ዋንጫ ሊሸለሙ ችለዋል።



አስተያየት ይስጡ