የአፍሪካ ቻምፒየንስ ሊግ እና ኮንፌዴሬሽን ካፕ የቅደመ ማጣሪያ ጨዋታዎች የተጫዋቾች ምዝገባ በዛሬው ዕለት ይጠናቀቃል

በአፍሪካ ቻምፒየንስ ሊግ እና ኮንፌዴሬሽን ካፕ ተሳታፊ የሆኑ ክለቦች በቅደመ ማጣሪያ ጨዋታዎች የሚጠቀሙትን የቡድን ስብስብ ማስመዝገቢያ ቀነ ገደብ በዛሬው ዕለት ይጠናቀቃል ።

የውድድሮቹ የበላይ አካል የአፍሪካ እግርኳስ ኮንፌዴሬሽን(CAF) በቅድመ ማጣሪያ የደርሶ መልስ ጨዋታዎች ላይ ክለቦች የሚጠቀሟቸውን ተጫዋቾች እንዲያስመዘግቡ ከሰኔ 24 ጀምሮ ክፍት አድርጎ ቆይታል ።

ለአንድ ወር የቆየው የተጫዋቾች ማስመዝገቢያ ጊዜም ዛሬ ለሊት 6:00 ላይ ያበቃል ።

ክለቦችም በደርሶ መልስ ጨዋታዎቹ የሚጠቀሟቸውን እና ዝውውር ፈፅመው ዝውውራቸው በየፌዴሬሽናቸው የፀደቁ ተጫዋቾችን እስከተጠቀሰው ሰዓት ድረስ የማስመዝገብ ግዴታ አለባቸው ።

በዛሬው ዕለት ልምምዳቸውን የሚጀምሩት ቅዱስ ጊዮርጊስ እና ባህርዳር ከተማም ከዛሬ ዝውውሮቻቸው መጠናቀቅ በኋላ አጠቃላይ ስብስባቸውን እንደሚያስመዘግቡ ይጠበቃል ።

እስከዛሬው ዕለት ድረስ የኢትዮጵያ እግርኳስ ፌዴሬሽን ባረጋገጣቸው ዝውውሮች መሰረት ቅዱስ ጊዮርጊስ የአስር ተጫዋቾቹን ውል ሲያራዝም አማኑኤል አረቦን ከለገጣፎ ለገዳዲ እንዲሁም ፋሲል ገብረሚካኤልን ከባህርዳር ከተማ አስፈርሟል ።

ባህርዳር ከተማ በበኩሉ ፍሬው ሰለሞንን ከሲዳማ ቡና ፣ አላዛር ማርቆስ ከሀዋሳ ከተማ ፣ ረጂብ ሚፍታህ ከቤንች ማጂ እንዲሁሕ ፍሬዘር ካሳን ከሀድያ ሆሳዕና ማስፈረሙ ይታወሳል ።