ከተመሠረተ ወደ አራተኛ አመቱ የተጠጋው የኢትዮጵያ ሴት እግር ኳስ የሙያ ማህበር ጠቅላላ ጉባኤውን ዛሬ በአዳማ አድርጓል።

በ2015 አመተ ምህረት ምስረታውን ያደረገው እና በአሁኑም ሰዓት በርካታ ስራዎችን እየሰራ የሚገኘው የኢትዮጵያ ሴቶች እግር ኳስ አሰልጣኞች የሙያ ማህበር በመልካ አዳማ ሆቴል አመታዊ ጠቅላላ ጉባኤውን የማህበሩ አባላት እና በርካታ ጥሪ የተደረገላቸው እንግዶች በተገኙበት በአዳማ ከተማ በዛሬው ዕለት ተደርጓል። የሙያ ማህበሩ ፕሬዝዳንት አሰልጣኝ ብርሀኑ ግዛው የመክፈቻ ንግግር በማድረግ ያስጀምሩት ይህ ጉባኤ በመቀጠል የኢትዮጵያ እግር ኳስ ፌድሬሽን ተወካይ ኢንስትራክተር በሀይሏ ዘለቀ እና የሲቪክ ማህበራት ባለስልጣን አቶ እንዳሻው በየተራ ስለ ማህበሩ ሃሳባቸውን መስጠት የቻሉ ሲሆን በተለይ ሌሎች የስፖርት ማህበር ተቋቁመው ብዙም እንቅስቃሴ ሲያደርጉ በማይታይበት በዚህ ወቅት በአጭር ጊዜ ተመስርቶ በርካታ ለውጥን እያመጣ የሚገኘው ይህ ማህበር ከፍ ያለ ድርሻ ስለተወጣ ሊበረታታ እንደሚገባው ተጠቁሟል።
በመቀጠል የ2018 ዕቅድ አፈፃፀም ፣ የአመቱ ክንውን እና የፋይናንስ ሪፖርት ከቀረበ በኋላ የ2019 ዕቅድም በዝርዝር በጉባኤው ላይ መቅረብ የቻለ ሲሆን ከተሳታፊዎች ሀሳብ ከተሰጠ በኋላ በመጨረሻም ውሳኔ የሚያስፈልጋቸው ጉዳዮች ላይ ውይይት ከተደረገ በኋላ አስተዋጽኦ ላደረጉ አካላት እና የሚዲያ ባለሙያዎች የዕውቅና ስነ ስርዓት ተደርጎ ጉባኤው በመጨረሻም መቋጫውን አግኝቷል።
አስተያየት ይስጡ