የሰበታ ከተማ ተጫዋቾች የዕረፍት ጊዜያቸውን አጠናቀው ለሁለተኛ ዙር ዝግጅት እንዲጀምሩ ከክለቡ ጥሪ ቢደረግላቸውም ከደመወዝ እና ጥቅማ ጥቅም ጋር በተያያዘ ልምምድ ለመጀመር ፈቃደኛ ሳይሆኑ መቅረታቸውን ከሳምንት በፊት መዘገባችን ይታወሳል ።
አሁን ደግሞ የመሀል ተከላካዩ በረከት ሳሙኤል ከሰበታ ከተማ ጋር ለመለያየት የመልቀቂያ ደብዳቤ ማስገባቱ ተሰምቷል ። ተጫዋቹ በደብዳቤው እንደገለፀው ከሆነ በቤተሰቡ ላይ ያጋጠመው ከአቅም በላይ የሆነ ችግር ከክለቡ ጋር ለመለያየት ጥያቄ እንዲያቀርብ አድርጎታል ።
በረከት በመጀመሪያው ዙር ሰበታ ከተማ ካደረጋቸው 15 ጨዋታዎች በ11 ተሰልፎ የተጫወተ ሲሆን ሁለት ግቦችንም በፍፁም ቅጣት ምት ማስቆጠር ችሎ ነበር ።

አስተያየት ይስጡ