በግብፅ አስተናጋጅነት ለሚካሄደው የአፍሪካ ሴቶች ሻምፒየንስ ሊግ የሴካፋ ዞን ማጣርያውን እያካሄደ የሚገኘው የኢትዮጵያ ንግድ ባንክ ሴቶች ክለብ በምድቡ የመጨረሻ ሶስተኛ ጨዋታ ተጋጣሚዉን ዩይ ጆይንት ስታር ከማራኪ የጨዋታ ብልጫ ጋር 10ለ0 አሸንፋል።
በተመሳሳይ አስር ጎሎችን አስቆጥረው ካሸነፉበት የኒዉ ጄኔሬሽን ጨዋታ የስድስት ተጫዋቾችን ለዉጥ አድርገዉ ወደ ሜዳ የገቡት ንግድ ባንኮች በካሳራኒ ስታዲየም ባደረጉት የምድቡ ሶስተኛ ጨዋታም ተጋጣሚያቸው ዩይ ጆይንት ስታር ላይ ጎሎችን ማዝነባቸዉን ቀጥለዉበታል።
በጨዋታዉም አምበሏ ሎዛ አበራ ስድስት ጎሎችን ስታስቆጥር በውድድሩም ያስቆጠረቻቸውን የግብ መጠን ወደ አስራ ሁለት ከፍ አድርጋለች። ቀሪዎቹን የንግድ ባንክ ጎሎች መዲና አዎል እና ፀጋነሽ ወልደየሱስ እያንዳንዳቸው ሁለት ጎሎችን ማስቆጠር ችለዋል።

ንግድ ባንክ በሶስት ጨዋታዎች በተጋጣሚዎቻቸው ላይ ሀያ አራት ጎሎችን ከመረብ ማሰረፍ የቻሉ ሲሆን ፤ ምድባቸውንም በበላይነት በማጠናቀቅ ግማሽ ፍፃሜውን ለመቀላቀል ችለዋል።
በተያያዘም ኢትዮጵያ ንግድ ባንክ በቀጣይ ሰኞ ከዩጋንዳው ሌዲ ዶቭ ጋር ጨዋታቸውን የሚያካሂዱ ይሆናል። ንግድ ባንክ ሰኞ ድል የሚቀናቸው ከሆነ ምስራቅ አፍሪካን በመወከል በግብፅ በህዳር ወር 2014 ላይ ለሚካሄደው አሁጉራዊ የመጨረሻ ውድድር ተሳታፊ ይሆናሉ ።
አስተያየት ይስጡ