👉👉ተመልካች ጥሩ እንቅስቃሴ ተመልክቷል ብዬ አስባለሁ ውበቱ አባተ (ሰበታ ከተማ)

👉👉ዳኞቻችን ከስሌት ውስጥ መውጣት አለባቸው ካሳዬ አራጌ (ኢትዮጵያ ቡና)

 

14ኛ ሳምንት የኢትዮጵያ ፕሪምየር ሊግ ዛሬ ሲጠናቀቅ ሰበታ ከተማ ከ ኢትዮጵያ ቡና ጋር 0-0 አቻ ከተለያዩ በኃላ የሁለቱ ቡድን አሰልጣኞች ለጋዜጠኞች አስተያየት ሰጥተዋል።

ተመልካች ጥሩ እንቅስቃሴ ተመልክቷል ብዬ አስባለሁ ውበቱ አባተ (ሰበታ ከተማ)

ስለጨዋታው

በሁለታችንም በኩል ክፍት ጨዋታ ነበር።ተመልካች ጥሩ እንቅስቃሴ ተመልክቷል ብዬ አስባለሁ። ተጫዋቾቼ የምንፈልገውን ነገር በድፍረት እንዳያደርጉ አንዳንድ ግልፅ ያልሆኑ ስህተት የነበሩባቸው የዳኝነት ውሳኔዎች ያስገደዳቸው ይመስለኛል። ዳኛው ጨዋታውን ለመቆጣጠር በማሰብ በርካታ ካርዶችን መምዘዙ የጨዋታው እንቅስቃሴ እንዲቆራረጥ አድርጎታል። እንደአጠቃላይ በሁለታችንም በኩል ጥሩ ጨዋታ ነበር።

ዳኞቻችን ከስሌት ውስጥ መውጣት አለባቸው ካሳዬ አራጌ (ኢትዮጵያ ቡና)

ስለጨዋታው

ጨዋታው ጥሩ ነበር። ነገርግን በሁለተኛው አጋማሽ ጎል ያስፈልገን ስለነበር ትንሽ ጥድፊያ የበዛበት ነበር።ተጋጣሚዎቻችን ይዘው ከሚመጡት ነገር አንፃር እኛ የምናስባቸው ነገሮች አሉ። እስካሁን ድረስ አብዛኛዎቹ የገጠምናቸው ቡድኖች በሶስት የተለያዩ መንገዶች ይቀርባሉ። ነገርግን ባለፈው ሳምንት ወልቂጤዎች በተለየ መንገድ በአራተኛው መንገድ ቀርበዋል። ስለዚህ እነዚህን ግምት ውስጥ በማስገባት እኛ ሁለተኛ አማራጭ ብቻ ሳይሆን እንደ ተጋጣሚያችን ሁኔታ እስከ አራተኛ አማራጭ ድረስ ይኖሩናል ማለት ነው። ረጃጅም ኳሶች ከዚህ በፊት የሚደረጉ ነገሮች ናቸው።

ስለ ጨዋታው ስለዳኝነት

ዳኞችን በተመለከተ ሁለት አይነት ነገር ነው ያለኝ አንደኛው ከዚህ በፊት ተናግሬዋለሁ። ዳኞች በተለያዩ ቴክኖሎጂዎች እየታገዙ ያሉት ከዳኞች የተሰወረ ነገር ስላለ ነው። ስለዚህ ያሉትን ስህተቶች በዛ መልኩ ተረድቶ መታገስ ያስፈልጋል። ሁለተኛው ሁሌም የምለው ነገር ዳኞቻችን ከስሌት ውስጥ መውጣት አለባቸው። ይሄ ቡድን እየተመራ ነው እዚህ ጋር ቅጣት ሰጥቼባቸዋለሁ ምናምን ከሚሉ አስተሳሰቦች መውጣት አለባቸው። ከዛ ውጭ ያሉ ከህግ አንፃር ያሉ ስህተቶችን ግን መታገስ ያስፈልጋል።