ሪፖርት | ሰበታ ከተማ በሜዳው ጅማ አባጅፋርን አሸንፏል

በተቀዛቀዘ የደጋፊዎች ድባብ በተጀመረው የሁለቱ ቡድኖች የስምንተኛ ሳምንት መርሀ ግብር መስኡድ መሀመድ የቀድሞው ክለቡን ለመጀመሪያ ጊዜ ገጠሟል ::

ሰበታዎች አጥቅተው በመጫወት የመጀመሪያውን አስር ደቂቃዎች ወደ ጅማ የግብ ክልል ሲደርሱ የተስተዋሉት ሰበታዎች በግራ መስመር ወንዲፍራው ጌታሁን ወደ ሳጥን ይዞ የገባውን ኳስ በጅማ ተከላካዮች ተጠልፎ ፍፁም ቅጣት ምት ማግኘት ችለዋል ::

የተገኘውን ፍፁም ቅጣት ፍፁም ገብረ ማርያም ሲያስቆጥር ባለፉት አራት የሊጉ ጨዋታዎች ላይ ያስቆጠራቸውን የጎል መጠን ወደ አራት ከፍ ማድረግ ችሏል ::

ከግቡ መቆጠር በኋላ መሀል ሜዳውን በቁጥር በመብለጥ ኳስን ይዘው መጫወት የፈለጉት ሰበታዎች አልፎ አልፎ የግብ ሙከራዎችን ሲያደርጉ ከግራ መስመር ተሻምቶ ባኑ ዲያዋራ የሞከራት ኳስ የምታስቆጭ አጋጣሚ ነበረች ::

ከጎሉ መቆጠር በኋላ ጅማ አባ ጅፋሮች የጎል እድሎችን ለመፍጠር ቢሞክሩም የተሳካ ሙከራን ማድረግ ተስኗቸው ተስተውሏል ::

በተለይም በመልሶ ማጥቃት ያገኙትን ኳስ ጀሚል ያቆብ ለመሀመድ ያኩቡ አሻግሮሎት ሳይጠቀምበት የቀረው አጋጣሚ በጅማዎች በኩል የሚጠቀስ ሙከራ ነበር ::

በሰበታ በኩል ኳስን ተቆጣጥሮ ለመጫወት ሲፈልጉ በአንድ አጋጣሚ ባኑ ዲያዋራ ከቅጣት ምት አክርሮ መቶ በጎሉ አግዳሚ ልትወጣበት ችላለች :: በተለይም በመጀመሪያው አጋማሽ ላይ በቀኝ መስመር ላይ ይገኝ የነበረው ሳሙኤል ታዬ በጨዋታው ሂደት ላይ ሲባክን ታይቷል ::

የመጀመሪያው አጋማሽም ብዙም ሙከራዎች ሳይታዩበት ሊጠናቀቅ ችሏል ::

በሁለተኛው አጋማሽ በተሻለ የማጥቃት እንቅስቃሴ የገቡት ሰበታዎች ጨዋታው በተጀመረ በመጀመሪያዎቹ ደቂቃዎች ባኑ ዲያዋራ ከመስመር ይዞ በመግባት ለመስኡድ አሻግሮለት መስኡድ መሀመድ ለሰበታ ሁለተኛውን ጎል ሊያስቆጥር ችሏል ::

ከጎሉ መቆጠር በኋላ የቀድሞው ክለቡ ላይ ግብ ያስቆጠረው መስኡድ ደስታውን ሳይገልፅ ተስተውሏል ::

ጅማ አባ ጅፋሮች ጎል ካስተናገዱ በኋላ ወደ ሰበታ ከተማ የግብ ክልል በተደጋጋሚ ለመሄድ ቢችሉም ኳስ እና መረብን ማገናኘት ሳይችሉ ቀርተዋል ::

በተለይም ቅጣት ምት አግኝተው መሀመድ ያኩቡ አክርሮ መቶት የግቡ አግዳሚ የመለሰችበት ሙከራ የምታስቆጭ አጋጣሚ ነበረች ::

ከደቂቃዎች በኋላ ጅማ አባ ጅፋር ተደጋጋሚ ሙከራዎቻቸው ፍሬ ሊያፈራላቸው ችሏል ::

በቀኝ መስመር በኩል አመረላ ደልታታ ያሻማውን ኳስ መሀመድ ያኩቡ ከተደጋጋሚ ሙከራዎች በኋላ ጅማዎችን ሊያንሰራሩ የሚችሉበትን ጎል አስቆጥሯል ::

ከጎሉ መቆጠር በኋላ ሰበታዎች ወደ ግብ ለመድረስ ሲሞክሩ መሪነታቸውን ያጠናከሩበትን ጎል በአሊ ባድራ አስቆጥረዋል ::

ጨዋታው በሰበታ የበላይነት ሲጠናቀቅ በደረጃ ሰንጠረዡ ሌሎች ቡድኖች እስኪጫወቱ ድረስ በአምስተኛ ደረጃ ላይ ተቀምጠዋል ::