ወልዋሎ አዲግራት ዩኒቨርስቲ እና አሰልጣኝ ግርማ ታደሠ ውል ለማደስ ተስማሙ።
ወልዋሎ አዲግራት ዩኒቨርስቲን የ2018 የኢትዮጵያ ዋንጫ አሸናፊ ማድረግ የቻሉት እና አመቱን በብዙ ውጣ ውረዶች ያሳለፉት አሰልጣኝ ግርማ ታደሠ ለቀጣዮቹ ሁለት አመታት በወልዋሎ ለመቆየት ስለ መስማማታቸው ለሀትሪክ ስፖርት ተናግረዋል። በትውልድ ከተማቸው ክለብ ሀድያ ሆሳዕና የጀመሩት እና ለሁለት ጊዜያትም ያህል ክለቡን ወደ ፕሪምየር ሊጉ ማሳደግ የቻሉት አሰልጣኙ ደቡብ ፓሊስም በተመሳሳይ ወደ ሊጉ ማሳደግ የቻሉ ሲሆን በከፍተኛ ሊጎቹ ስልጤ ወራቤ እና ሀምበሪቾ ዱራሜም ቆይታን አድርገዋል።

ወልዋሎን የጥሎ ማለፍ አሸናፊ በማድረጋቸው በአፍሪካ ኮንፌዴሬሽን ዋንጫ ክለቡን ተሳታፊ ያደረጉት አሰልጣኝ ግርማ ታደሠ ውላቸው መጠናቀቁን ተከትሎ ወደ ከፋሲል ከነማ ጋር ንግግር በማድረጋቸው ወደ ክለቡ ያመራሉ ተብሎ ቢጠበቅም ትላንት አመሻሽ ከወልዋሎ ቦርድ ጋር ድንገት በተደረገ ውይይት የቀረበላቸው አማላይ ጥቅማጥቅም በክለቡ ለመቀጠል እንዲስማሙ እንዳደረጋቸው ይገልፃሉ። “የእነርሱ ፍላጎት በጣም ከፍተኛ ነበር ትላንት አመሻሹን ከግማሽ ሰዓታት ከፈጀ ንግግር በኋላ በክለቡ ለሁለት አመት ለመቀጠል በቃል ደረጃ ተስማምቻለሁ የቀረበልኝ ጥቅማጥቅም በቀላሉ ሌላ ክለብ የማገኘው አይደለም” ሲሉ ሀሳባቸውን ለጣቢያችን ገልፀዋል።
አስተያየት ይስጡ