የጨዋታ ዘገባ | ለገጣፎ ለገዳዲ ሲዳማ ቡናን አሸንፏል !!

በቤትኪንግ ኢትዮጵያ ፕሪምየር ሊግ የ29ነኛ ሳምንት ጨዋታ ሶስተኛ ዕለት የመጀመሪያ ጨዋታ መውረዱን ያረጋገጠው ለገጣፎ ለገዳዲ በጥሩ መሻሻል ላይ ይገኝ የነበረዉን ሲዳማ ቡና 3ለ2 በሆነ ዉጤት ማሸነፍ ችሏል።

ከመርሐግብሩ መጀመር አስቀድሞ በርካቶች ለሲዳማ ቡና የማሸነፍ ቅድመ ግምት በሰጡበት ጨዋታ በመጀመሪያዎቹ አስራ አምስት ሀያ ያህል ደቂቃዎች ባልተጠበቀ መልኩ ለገጣፎ ለገዳዲ በጨዋታዉ ተሽለው ሲንቀሳቀሱ በሙከራ ረገድም በ18ተኛዉ ደቂቃ ላይ የፊት መስመር ተጫዋቹ ቴዲ ንጉሱ በከተፈራ አንለይ የተሻገረለትን ኳስ በቀታ ወደ ግብ ሞክሮ የነበረ ቢሆንም በግብ ዘቡ አዱኛ ፀጋየ አማካኝነት ኳሷ ግብ ከመሆን መክናለች።

ከሁለት ደቂቃዎች በኋላ ደግሞ ለገጣፎ ለገዳዲ ግብ ማስቆጠር ችለዋል ፤ በዚህም በ21ኛዉ ደቂቃ ላይ ከማዕዘን የተሻማዉን ኳስ ቁመተ መለሎዉ አጥቂ ካርሎስ ዳምጠዉ በግንባሩ በመግጨት ወደ ግብነት በመቀየር ክለቡን መሪ ማድረግ ችሏል።

በተቃራኒው በጨዋታው ደካማ አጀማመር ያደረጉት ሲዳማዎች በተለይ በመጀመሪያው አጋማሽ በለገጣፎ ብሎጫ ተወስዶባቸዉ ግብ ለማስቆጠርም ሆነ ለግብ የቀረበ ሙከራ ለማድረግ ሲቸገሩ ሲስተዋል በ27ተኛዉ ደቂቃ ላይ ግን በአጋማሹ ተጠቃሽ ሙከራን በአማካዩ አበባየሁ ዮሀንስ አማካኝነት ማድረግ ችለዋል። በዚህም በጥሩ ቅብብል ከመሐል ክፍል የተቀበለዉን ኳስ አማካዩ ከርቀት በቀጥታ ወደ ግብ ሞክሮ የነበረ ቢሆንም የግብ ዘቡ ኮፊ ሜንሳህ እንደምንም መልሶበታል።

በዚህ ሂደት በቀጠለዉ ጨዋታም አጋማሹ ሊጠናቀቅ አራት ደቂቃዎች ብቻ ሲቀሩ በ41ኛዉ ደቂቃ ላይ መሪነታቸዉን ወደ ሁለት ከፍ ማድረግ የቻሉበትን ግብ ማስቆጠር ችለዋል። በዚህም ግብ ጠባቂዉ አዱኛ ፀጋየ የመለሰዉን ኳስ አጥቂዉ አማኑኤል አረቦ በአስደናቂ እይታ ወደ ግብነት በመቀየር የክለቡን መሪነት ወደ ሁለት ለዜሮ ከፍ ማድረግ ችሏል።

ከዕረፍት መልስ በርከት ያሉ ተጫዋቾችን ቀይረዉ ወደ ሜዳ በማስገባት ወደ ጨዋታው ለመመለስ የሞከሩት ሲዳማዎች በጥሩ የመሐል ሜዳ እንቅስቃሴ በጨዋታዉ አደጋ ለመፍጠር በሚጥሩበት ወቅት በ62ተኛዉ ደቂቃ ላይ ሶስተኛ ግብ ተቆጥሮባቸዋል። በዚህም የፊት መስመር ተጫዋቹ ሱለይማን ትራኦሬ ለራሱ የመጀመሪያውን ለክለቡ ደግሞ ሶስተኛ ግብ ማስቆጠር ችሏል።

ገና በጨዋታዉ 60 ያህል ደቂቃዎች ሳይጠበቅ በለገጣፎ ሶስት ጎል ያስተናገዱት ሲዳማዎች ደግሞ በ70ኛዉ ደቂቃ ላይ ወደ ጨዋታዉ የሚመልሳቸዉን ግብ ማስቆጠር ችለዋል። በዚህም ተከላካዩ ያኩቡ መሐመድ ከርቀት አክርሮ ወደ ግብ የላካት ኳስ የግብ ጠባቂዉ ኮፊ ሜንሳህ መረብ ላይ አርፋለች።

ወደ ጨዋታዉ የሚመልሳቸውን ግብ ማስቆጠር ከቻሉ በኋላ ጫና ፈጥረዉ መጫወት የቀጠሉት ሲዳማዎች በ79ነኛዉ ደቂቃ ላይ በግራ ተከላካዩ መሐሪ መና አማካኝነት ድንቅ ሙከራ አድርገዉ በድጋሚ ከሰባት ደቂቃዎች በኋላ በ86ተኛዉ ደቂቃ ደግሞ በዚሁ ተጫዋች አማካኝነት ግብ ማስቆጠር ችለዋል።

በጨዋታው የመጨረሻ ደቂቃዎች ላይ ጫና ፈጥረዉ ሁለት ጎሎችን ማስቆጠር የቻሉት ሲዳማ ቡናዎች ተጨማሪ ግብ ማስቆጠር ሳይችሉ ቀርተዉ በለገጣፎ ለገዳዲ 3ለ2 በሆነ ዉጤት የተሸነፉ ሲሆን በጨዋታዉ መገባደጃ ወቅትም የለገጣፎዉ አጥቂ ሱለይማን ግብ ጠባቂዉ አዱኛ ፀጋየ ላይ ጥፋት መስራቱን ተከትሎ በቀይ ካርድ ከሜዳ ተሰናብቷል።