👉 ፌዴሬሽኑ በበኩሉ እኔም አራት ክለቦችን አግጃለሁ
ብሏል…
ዓለም አቀፉ የእግርኳስ ማህበር ፊፋ ከተጨዋቾች ክፍያና ሌሎች ተያያዥ ጉዳዮች የፕሪሚየር ሊጉን አምስት ክለቦች ላይ ርምጃ መውሰዱ የደረሰን መረጃ ያስረዳል።
ፊፋ ለኢትዮጵያ እግርኳስ ፌዴሬሽን እንደገለጸው ከደመወዝ ክፍያ ጋር ተያይዞ ኢትዮጵያ መድን ፣ወልቂጤ ከተማና ከቀናቶች በፊት ደግሞ ፋሲል ከነማን ማገዱን አስታውቋል። ሀድያ ሆሳዕናና አዳማ ከተማ በፊፋ ታግደው የነበረ ቢሆንም የሚጠበቅባቸውን በመክፈላቸው እገዳው መነሳቱ ታውቋል። ሌሎቹ አራት ክለቦች ደግሞ ማለትም በፊፋ ዕገዳው የተነሳላቸው ሀድያ ሆሳዕናና አዳማ ከተማን ጨምሮ መቻልና ድሬዳዋ ከተማ በፌዴሬሽኑ የዲሲፕሊን ኮሚቴ ውሳኔ መሰረት የትኛውንም ዝውውር ማድረግ እንደማይችሉ ታውቋል። በዚህም መሰረት ሰባቱም ክለቦች ከፌዴሬሽን የመመዝገቢያ ወረቀቱን ወስደው ማስፈረም ቢችሉም ፊፋ ወደ ሚያውቀውና ወደሚጸድቅበት ቋት መግባት እንደማይችል የኢትዮጵያ እግር ኳስ የህዝብ ግንኙነት ክፍል ሃላፊ የሆኑት አቶ አብርሃም ገ/ማሪያም ተናግረዋል።
በፌዴሬሽኑ የፍትህ አካላት የሚወሰኑ የእገዳ ውሳኔዎች በአመራሮች ሽምግልና መግባት ክለቦቹ የልብ ልብ ተሰምቷቸው የታዘዙትን ሳይፈጽሙ የሀገር ውስጥ ተጨዋቾች መብት ሲጣስና የፌዴሬሽኑ ጽ/ቤት በፍትህ ያለህ ባዮች ሲንኳኳ ለአመታት ኖሯል ይህ ሁኔታ እንዳይቀጥል የስፖርት ቤተሰቡ ጥሪ ሆኗል።
“አራቱ በፊፋ ያልታገዱ ክለቦች የተወሰነውን ውሳኔ የግድ ማክበር አለባቸው። ሳይከፍሉ ዝውውራቸው ቢጸድቅና ተጨዋቾቹ ቢከሱ ጠንከር ያለ ቅጣት ፌዴሬሽኑ ላይ ስለሚያስከትል የተወሰነውን ተግባራዊ ከማድረግ ውጪ ሌላ አማራጭም አይኖርም” ሲሉ አቶ አብርሃም አሳስበዋል።
ከሰባቱ ቅጣት የተላለፈባቸው ክለቦች የመጨረሻው የፋሲል ከነማ ሲሆን በላይቤሪያዊው ክሌይመንት ሞሊ ካርፐህ የደመወዝ ይከፈለኝ ክስን ፊፋ መቀበሉን በመግለጽ ከነሀሴ 11/2023 ጀምሮ ባሉት 45 ለቀናት ውስጥ ለላይቤሪያው ተጨዋች 4,180,440 እስከሚከፍሉበት ቀን ድረስ 5 በመቶ ወለድ ጭምር እንዲከፍሉ አሳስቦ ክለቡ የተጨዋቹን ደመወዝ ካልከፈለ ከሶስት ተከታታይ የዝውውር መስኮት እንደሚያገደው አስጠንቅቋል። ፊፋ ከደመወዙ ውጪ ተጨዋቹ ያቀረበው ተጨማሪ የካሳ ክሶችን ውድቅ ማድረጉንም አስረድቷል።
ፋሲል ከነማ ላይቤሪያዊውን ተጨዋች ለማስፈረም የቅድመ ኮንትራት ስምምነት ከፈረመ በኋላ ሃሳቡን በመቀየሩ ተጨዋቹም ጉዳዩን ወደ ፊፋ እንደወሰደውና ፋሲል ከነማም ያቀረበው ይግባኝ ውድቅ መደረጉ ታውቋል። የክለቡ ዋና ስራ አስኪያጅ አቶ አቢዮት ብርሃኑ የክለቡ ይግባኝ ውድቅ መደረጉንና እንዲከፍሉ መወሰኑን ገልጸዋል። ጉዳዩ የተከሰተውም ኦሴ ማውሊን የማዘዋወር ዕድል ሲገኝ በተፈጠረ መዘናጋት መሆኑንም ጨምረው አስረድተዋል።
በፊፋ ዕገዳ ምክንያት አስቻለሁ ታመነ ወደ መቻል ጋቶች ፓኖም ወደ ፋሲል ከነማ ያደረጉት ትልልቅ ዝውውሮች ላይ ዕክል መፍጠሩ ታውቋል።
አስተያየት ይስጡ