የአዲስ አበባ አትሌቲክስ ፌዴሬሽን የቅዳሜውን ጠቅላላ ጉባኤን አገደ….

👉….የጽ/ቤቱን ሃላፊዋንም ፌዴሬሽኑን ወክለው እንዳይሰሩ
አግዷል…

የአዲስ አበባ አትሌቲክስ ፌዴሬሽን ስራ አስፈጻሚ ኮሚቴ ዛሬ ባካሄደው ስብሰባ የፊታችን ቅዳሜ በቫይብስ ሆቴል የተጠራውን ጠቅላላ ጉባኤ ህጋዊነት የጎደለው ነው በሚል እንዳይካሄድ ጉባኤውም ለሌላ ጊዜ እንዲተላለፍ ወሰነ።

ፕሬዝዳንቱ አቶ ቢኒያም ምሩጽ በጠሩት በዚህ ስብሰባ ዘጠኙም አመራርች የተገኙ ሲሆን ” የጉባኤውን ቀንና ቦታ ለመወሰን የተጠራው ስብሰባ ፕሬዝዳንቱ የማያውቁት በጸሃፊዋ የተጠራና ምልዓተ ጉባኤ ያልተሟላ መሆኑ አራቱ አመራሮች በቀጣይ ለመወዳደር ዕጩ በመሆናቸው ጥሪው ተቀባይነት የለውም …የጠቅላላ ጉባኤው ወጪ ከፕሬዝዳንታዊና አብላጫ ስራ አስፈጻሚ እውቅና ውጪ በመሆኑና 50+1 የሚለውን የማያሟላ በመሆኑ ህገወጥ ነው” ሲል ተቃውሟል።

ፌዴሬሽኑ በሚወክለው አስመራጭ ኮሚቴ ዕጩዎችን መመርመር ሲገባው በፌዴሬሽኑ ጸሃፊና በቢሮው ጣልቃ ገብነት የታየ ከመሆኑም ባሻገር የአ/አ አንጋፋ አትሌቶች ማህበር ፣ የአዲስ አበባ ዳኞችና አሰልጣኞች ማህበራት ከመመሪያው ውጪ በቢሮው ጫና እንዳይሳተፉ መደረጋቸው እንዲሁም መሻሻል ያለባቸው መተዳደሪያ ደንቦች በስራ አስፈጻሚው ታይተው ለጉባኤው መቅረብ ሲኖርበት የጽ/ቤት ሃላፊዋ በሌላቸው ስልጣን ተካቶ እንዲቀርብ መደረጉን በተጨማሪነት በመግለጽ የቅዳሜውን ጉባኤ ህጋዊነት የሌለው ነው በማለት ውሳኔ አስተላልፏል።

ዘጠኙ አመራሮች በስብሰባው ላይ ተገኝተው አጀንዳው ቢያዝም አራቱ አመራሮች ዶክተር ትዕዛዙ ሞሴ፣ አቶ መልካሙ ተገኝ፣ ወ/ሮ አለምነሽ ፈጠነና አቶ ተፈሪ ታደሰ በዚህ አጀንዳ ላይ አንወያይም በማለት ስብሰባውን ረግጠው ወጥተዋል። የፌዴሬሽኑ ጽ/ቤት ሃላፊ ወ/ሮ እታፈራሁ ገብሬም ተጠሪነቴ ለፌዴሬሽኑ ፕሬዝዳንት ሳይሆን ለወጣቶችና ስፖርት ቢሮ ማህበራት ማደራጃ ዳይሬክቶሬት ዳይሬክተር አቶ አያሌው ታደሰ ነው በማለት በተመሳሳይ ስብሰባውን ረግጠው መውጣታቸውም ተገልጿል።

ስብሰባው በአምስቱ አመራሮች ማለትም ፕሬዝዳንቱ አቶ ቢኒያም ምሩጽ፣ የቴክኒክ ኮሚቴ ሰብሳቢው የአትሌቶች ማናጀር ተሰማ አብሽሮ፣ የቴክኒክ ኮሚቴው ምክትል ሰብሳቢ 50 አለቃ ስምረቱ አለማየሁ፣ የስራ አስፈጻሚ ኮሚቴ አባል የሆኑት አቶ ከንቲባ ለማና አቶ ሽመልስ ይልማ 50+1 በሚለው ህጋዊነትን በጠበቀ መልኩ ውይይት በማድረግ በሰጠው ውሳኔ የተጠራው ጉባኤ እንዲታገድና ለሌላ ጊዜ እንዲተላለፍ የጽ/ቤት ሃላፊዋ እታፈራሁ ገብሬ የተሰጣቸውን ሃላፊነት በመጠቀም ፌዴሬሽኑ ላይ አላስፈላጊ ችግርና ሁከት በመፍጠራቸው ፌዴሬሽኑን ወክለው እንዳይሰሩ ማገዱን ለሚመለከታቸው ባለድርሻ አካላት በላከው የውሳኔ ደብዳቤው ላይ ይፋ አድርጓል።