ወልቂጤ ከተማና አዳማ ከተማ በደመወዝ ጠያቂ ተጨዋቾች ተወጥረዋል

👉 አመራሮቹ ዝምታን መርጠዋል…

ወልቂጤ ከተማ ደመወዝ ከከፈለን አምስት ወር አልፎናል ከዚህ በኋላ አንታገስም ያሉ በርካታ ተጨዋቾች ከሆቴል መውጣታቸው ታውቋል።

ክለቡ ኢትዮጵያ ቡናን ከመግጠሙ በፊት የወልቂጤ ከተማ አመራሮች ተጨዋቾችን አነጋግረው በ3 ቀን ውስጥ ደመወዝ እንደሚከፍሉ ቃል ገብተው ቢሄዱም አሁን ድረስ ምላሽ እንዳልተሰጣቸውና ስልክ ሲደወል እንደማያነሱ ተጨዋቾቹ ይናገራሉ። ትዳራቸውን መምራት ያቃታቸው ጫና ውስጥ ያሉ ሃላፊነታቸውን መወጣት ያልቻሉ ተጨዋቾች መኖራቸው ትልቅ ሀዘን ውስጥ እንደከተታቸው ስማቸው እንዲጠቀስ ያልፈለጉ ተጨዋቾች እማኝነታቸውን ሰጥተዋል።

“ለክለቡ፣ ለማህበረሰቡና ለደጋፊው ትልቅ ክብር አለን” ያሉት ተጨዋቾቹ “ለጥቅምት 15 የተሰጠን ቼክ አሁን ድረስ ሳይከፈለን ሶስት ወር ሞላን ለባንኮች ሄደን ያልከሰስነውና ያላስመታነው ለዚህ ነው አሁን ግን በዝቷል” በማለት አስተያየታቸውን ሰጥተዋል። በአሰልጣኝ ሙሉጌታ ምህረት ጥረት ተጫውተናል ከአሁን በኋላ ግን ከብዶናል በማለት ለፌዴሬሽን ማመልከታቸውና ዲሲፕሊን ኮሚቴ ሊያየው መሆኑም ተሰምቷል። ከቡድኑ አባላት መሃል ወደ 16 የሚጠጉ ቡድኑ ካረፈበት ሆቴል የወጡ መሆናቸው የታወቀ ሲሆን የፊታችን እሁድ 9 ሰአት ከሀዋሳ ከተማ ጋር የሚያደርጉት 13ኛ ሳምንት ጨዋታ የመደረጉ ነገር አጠራጣሪ ሆኗል።

በዚህ ጉዳይ ያለውን የክለቡን ምላሽ ለማወቅ የቡድን መሪ ወደ ሆኑት አቶ አዲስ ወልዴ የደወልን ሲሆን ስልኩን አንስተው ጥያቄያችንን ከሰሙ በኋላ ይቆራረጣል አይሰማም በማለት ከመዝጋታቸውም በተጨማሪ በተደጋጋሚ ጊዜ ብንደውልም ቴክስት ብንልክም ባለመመለሳቸው የክለቡን ምላሽ ማወቅ አለመቻላችንን እንገልጻለን። ወልቂጤ ከተማ በእስካሁኑ 12 ጨዋታዎች 9 ነጥብና 11 የግብ ዕዳ ይዞ 14ኛ ደረጃ ላይ ይገኛል…

በተመሳሳይ አዳማ ከተማም በጨዋታ ሂደት በተለምዶ ከቋሚ 11 ውስጥ ናቸው ከሚባሉት ተጨዋቾች መሃል አምስቱ ቡድኑ ካረፈበት ሆቴል ወጥተዋል። አምስቱም ተጨዋቾች እንደሌሎቹ ተጨዋቾች የሶስት ወር ደመወዝና የፊርማ ክፍያ ያልተከፈላቸው በመሆኑ ቅሬታቸውን ለመግለጽ ቡድኑን ተነጥለው ወጥተዋል።

የቡድኑ አመራሮች ዘንድሮ ከአምስት ጊዜ በላይ መጥተው በሶሰት አራት ቀን ውስጥ ይከፈላል በማለት ቃል ቢገቡም ተፈጻሚ ሳያደርጉ ቀርተዋል። “ወደ 12 ጨዋታ ታግሰን ቆይተናል እስካሁንም መረጃው እንዳይወጣ የምንችለውን አድርገናል አሁን ግን ቤተሰባችንን የልጆቻችንን የትምህርት መክፈል እስካለመቻል በመቸገራችን ለምንወስደው ርምጃ ሃላፊነቱ የአመራርቹ ነው” በማለት አስጠንቅቀዋል። አዳማ ከተማ በፕሪሚየር ሊጉ 13ኛ ሳምንት ጨዋታ ቅዳሜ 12 ሰዓት ከባህር ዳር ከተማ ጋር የሚጫወት ሲሆን በ18 ነጥብና 2 ግብ 7ኛ ደረጃ ላይ ይገኛል።

የበርካታ ደጋፊ ባለቤት የሆነውና በሊጉ ታሪክ ጥንካሬያቸው ከሚወሳላቸው ክለቦች መሃል አንዱ የሆነው አዳማ ከተማ ከውጤት ይልቅ ደመወዝ ለመክፈል ከሚቸገሩት የሊጉ ክለቦች መሃል አንዱ መሆኑ እስከመቼ ይቀጥላል የሚለው የበርካታ ደጋፊዎቹ ጥያቄ ሆኗል።

በዚሁ የተጨዋቾቹ ቅሬታ ዙሪያ የክለቡን ምላሽ ለማወቅ ወደ ፕሬዝዳንቱ አቶ አንበሴ መገርሳ የእጅ ስልክ ብንደውልም ባለመመለሳቸው የክለቡን አቋም ማወቅ አልቻልንም።