*…. በ9 አመት ውስጥ የተገኘና የኢንተርናሽናል
አርቢትሮች ግዛትን የጣሰ አርቢትር ሆኗል……
*…. ኢንተርናሽናል ረዳት ዳኛ ትግል ግዛውም ለሁለት
አመታት በተከታታይ ያሸነፈ ረዳት አርቢትር ሆኗል…
*… ከአመታት በፊት የነበረው የኮከብ ዳኞች 25 ሺህ
ብር ሽልማት ወደ 110 ሺህ ብር ማደጉ ምርጫውን
ተጠባቂ አድርጎታል…
የ2015 የአመቱ የኢትዮጰያ ፕሪሚየር ሊግ ኮከቦች የሽልማትና የሊጉ የመዝጊያ ስነስርዓት ዛሬ ምሽት በሀያት ሪጀንሲ በሚካሄደው መርሃግብር ይጠናቀቃል ተብሎ ይጠበቃል።
- ማሰታውቂያ -
በእስካሁኑ ሻምፒዮኑ ቅዱስ ጊዮርጊስ ሁለተኛው ባህርዳር ከተማ ሶስተኛው ኢትዮጵያ መድን መሆናቸው የኮከብ ግብ አግቢነቱን የፈረሰኞቹ እስማኤል ኦሮ አጎሮ በ25 ግብ ከማሸነፉ ውጪ በርካቶቹ አሸናፊዎች ዛሬ ምሽት የሚታወቁ በመሆኑ ማነው ኮከብ የሚለው ትኩረት አግኝቷል።
የሽልማት ስነስርዓቱ ሊጀመርና ኮከቦቹ ሊለዩ ሰዓታት በቀሩበት በአሁኑ ወቅት ከታማኝ የመረጃ ምንጭ በተገኘ መረጃ ቢያንስ ባለፉት ስምንት አመታት ኢንተርናሽናሎች ብቻ የደመቁበትን መድረክ ፌዴራል አርቢትር ቢኒያም
ወ/አገኘሁ መጋራቱ የተረጋገጠ ሆኗል። የብሄራዊ ዳኞች ኮሚቴ ሙሉ መረጃውን ዛሬ ከቀትር በኋላ ይፋ እንደሚያድርገው ይጠበቃል።
በአመቱ የኮከቦች ምርጫ በተለያዩ መመዘኛዎች የተሻለ ነጥብ አግኝተዋል የተባሉት ኢንተርናሽናል ረዳት አርቢትር ትግል ግዛው የአመቱ ምስጉን ረዳት ዳኛ ዘርፍ በተከታታይ ለሁለኛ ጊዜ ማሸነፉ ታውቋል። ይህም ከረጅም አመታት በኋላ የተገኘ ትልቅ ክስተትም ሆኗል። የዋና ዳኝነቱን የኮከብነት ቦታ ፌዴራል አርቢትር ቢኒያም ወ/አገኘሁ ባለፉት ሁለት አመታት በተከታታይ ያሸነፉትን ኢንተርናሽናል አርቢትሮች በላይ ታደሰና ሃይለየሱስ ባዘዘውን አስከትሎ ከአመታት በኋላ ለፌዴራሎች ተስፋ ሰጪ የሆነ አሸናፊ ሆኗል።
በተለይ ኢንተርናሽናሎች ብቻ ለምን ይመረጣሉ ? በብቃት ከሆነ ፌዴራል አርቢትሮችም እድሉን ማግኘት አለባቸው በማለት በማህበርም በግልም ሲታገሉ ለነበሩት ዳኞች እንደ ትልቅ ስኬት ተቆጥሯል። ፌዴራል ዳኛ ሆኖ ኮከብ ከተባለ ኢንተርናሽናል ዳኛስ ለምን አልተደረገም ተብለን ጫና ውስጥ እንገባለን ለዚህም ኮከብነቱን አንሰጥም ሲሉ ለነበሩ ኮሚቴዎች በኮሚሽነር ሸረፋ ደሌቾ የሚመራው ኮሚቴ የሰጠው ውሳኔ አይን ገላጭ ውሳኔ ነው ተብሏል።
በአምናው የሽልማት መድረክ ላይ ከነበሩት ተሸላሚዎች ኢንተርናሽናል ረዳት ዳኛ ትግል ግዛውና ሻምፒዮኑ የቅ/ጊዮርጊስ አሰልጣኝ ዘሪሁን ሸንገታ ዳግም በዛሬው የሽልማት መድረክ ላይ የሚታዩ ይሆናል ተብሎ ይገመታል። በኮከቦቹ አርቢትሮች ምርጫ ላይ ምናልባት የሚነሳ ቅሬታ ሳይኖር እንደማይቀር የገመተው ምንጫችን ኮሚቴው የተአማኒነት ክስ እንዲነሳበት የሚያደርግ ውሳኔ ወስኖ ይሆን ? የሚል ጥያቄንም አቅርቧል።
በአቶ ጁነዲን ባሻ እና በአቶ ኢሳያስ ጅራ አራት አራት አመት የፕሬዝዳንትነት ዘመን በስምንት አመት ውስጥ ያልተሞከረውንና ዘንድሮ የተደፈረው የብሄራዊ ዳኞች ኮሚቴ ውሳኔ ምን ቅሬታና ደስታ ይፈጥር ይሆን ? የዳኞቹስ ምላሽስ..? የሚለው በቀጣዮቹ ቀናቶች የሚታወቅ ይሆናል። በአቶ ኢሳያስ ሁለተኛ የስልጣን ዘመን የመጀመሪያ አመት ያልተደፈረው ተደፍሯል ተብሏል።
ከ25 ሺህ ብር ያልበለጠ የኮከብነት ሽልማት ይሰጥ በነበረው የሽልማት ስነስርአት ባለፉት ሁለት አመታት ግን የኮከብ ዳኞቹ ሽልማት በከፍተኛ ሁኔታ ያደገ ሲሆን ያለፉት ሁለት አመታት ተሸላሚዎች እያንዳንዳቸው 110 ሺህ ብር መሸለማቸው ይታወሳል…ዘንድሮስ..? የሚለው ዛሬ ምሽት የሀያት ሪጀንሲ ሆቴል የመዝጊያ መርሃግብር ላይ የሚታወቅ ይሆናል።
