👉የአዳማ ሳይንስና ቴክኖሎጂ ፕሬዝዳንት የሰጡን ቦነስ አልተሰጠንም….
👉የሰኔን ጨምሮ ሁለት ወር ደመወዝ አልተከፈለንም…
“የአዳማ ሳይንስና ቴክኖሎጂ ዩኒቨርስቲ ፕሬዝዳንት ዶክተር ለሚ ጉታ የሰጡንን የ300ሺህ ብር የማበረታቻ ገንዘብ ክለቡ ከልክሎናል” ሲሉ የክለቡ ተጨዋቾች ቅሬታ አቀረቡ።
የዩኒቨርስቲው ፕሬዝዳንት ዶክተር ለሚ ጉታ አዳማ ከተማና ኢትዮጵያ መድን ከመጫወታቸው በፊት የተጨዋቾቹ መልበሻ ክፍል ገብተው ያበረታቱ ሲሆን “ለክለቡ የምንሰጠው ድጎማ እንዳለ ሆኖ በናንተ ደስተኛ ነኝ ፕሪሚየር ሊጉንም ያየሁት በእናንተ በመሆኑ ቁጥራችሁም 30 መሆኑ ስለተነገረኝ ማበረታቻ አስር አስር ሺህ ብር በአጠቃላይ 300 ሺህ ብር እንዲሰጣችሁ ተወስኗል ብለውን በቀናት ውስጥ በክለቡ አካውንት ውስጥ ማስገባታቸውን በላኩት መረጃ ብናረጋገጥም ክለቡ ዝም ብሎናል” ሲሉ ቅሬታቸውን ገልጸዋል።
ተጨዋቾቹ የግንቦት ወር ደመወዝ እንዲሁም ከ5800 እስከ 1000 ብር የሚደርስ የሰባት ጨዋታ ማበረታቻ እንዳልተሰጣቸው የገለጹ ሲሆን “የሰኔ ወር ከመጠናቀቁ በፊት የግንቦትና የሰኔ ወር ደመወዝ እንዲሰጠን ብለን ብንጠይቅም ምላሽ አላገኘንም” ሲሉ ተናግረዋል።
በጉዳዩ ዙሪያ የተጠየቁት የክለቡ ፕሬዝዳንት አቶ ጀመረ በቀለ በሰጡት ምላሽ “ቀሪ ደመወዛቸውን በቀጣዮቹ ቀናት እንከፍላቸዋለን ማበረታቻውንም ትላንት ሰጥተናቸዋል የተባለው ቅሬታ ግን ውሸት ነው” ሲሉ መልሰዋል። ከሰአታት በፊት ባገኘነው መረጃ ግን “ክለቡ በኦሮሚያና ኢትዮጵያ ንግድ ባንክ የሁለት ጨዋታ ማበረታቻ ቢከፍለንም የዩኒቨርስቲው ፕሬዝዳንት የሰጡንን የ10 ሺህ ብር ቦነሳችንን ሊሰጠን ይገባል ዶክተሩ የሰጡን ክለቡ ያልከፈለን ኢንሴንቲቭ መሙያ አይደለም” በማለት ቅሬታቸውን እያሰሙ ነው።
በሊጉ የመዝጊያ 30ኛ ሳምንት መርሀግብር በአዳማ አበበ ቢቂላ ስታዲየም ከነገ በስቲያ ሀሙስ ከቀኑ 9 ሰዓት ላይ ከወልቂጤ ከተማ ጋር የሚጫወቱት አዳማ ከተማዎች በ29 ጨዋታ 11 ጊዜ ረትተው 7 ጊዜ ተሸንፈው 11 ጊዜ አቻ ወጥተው በ40 ነጥብና 5 ግብ 7ኛ ደረጃ ላይ ይገኛሉ።
አስተያየት ይስጡ