የኢትዮጵያ አትሌቲክስ ብሔራዊ ቡድን የደጋፊዎች ማህበር ተመሰረተ

“ለአትሌቶቻችን ከሆቴላቸው እስከ አየር መንገድ ደማቅ አሸኛኘት እናደርጋለን ።”

“ለመረዳት ሳይሆን ፌዴሬሽኑን ለመርዳት የተቋቋመ ማህበር ነው ።”

“በግል ውድድሮችም ክብረወሰን ለሚያሻሻሽሉ አትሌቶች የክብር አቀባበል እናደርጋለን ።”

የኢትዮጵያ አትሌቲክስ ብሔራዊ ቡድን ደጋፊዎች ማህበር መስራች እና ፕሬዚዳንት አቶ ምንያህል ጌታቸው

ኢትዮጵያ በአትሌቲክስ ታሪክ ስማቸውን በደማቁ ካፃፉ እና በማፃፍ ላይ ካሉ ሀገራት ግንባር ቀደሟ ናት ። ይህ የስፖርት ዘርፍ ለሀገሪቱ የገፅታ ግንባታ እየተወጣ ያለው ሚናም ዕጅግ የላቀ ነው ።

መላው ኢትዮጵያዊም በአለም ሻምፕዮናዎች እና ኦሎምፒኮች ላይ በጀግኖች አትሌቶች በርካታ የደስታ ጊዜያትን አጣጥሟል ። ለዚህ የሀገራችን መለያ ለሆነው አትሌቲክስ ብዙዎች ዋጋ ከፍለው አረንጓዴ ቢጫ እና ቀዩን ሰንድቅ ከፍ አድርገው አሰቅለዋል ።

እነዚህን ጀግኖች በሞራል መደገፍ እና አትሌቲክስ ፌዴሬሽኑን ማገዝ ዓላማውን ያደረገው የአትሌቲክስ ደጋፊዎች ማህበር “የኢትዮጵያ አትሌቲክስ ደጋፊዎች ማህበር” በሚል መጠሪያ በዛሬው ዕለት በይፋ ተመስርቷል ።

በኔክሰስ ሆቴል በተደረገው የማህበሩ ምስረታ መርሐግብር ላይም በኢፌዲሪ ባህልና ስፖርት ሚኒስቴር የስፖርት ዘርፍ ሚኒስትር ዴኤታ አምባሳደር መስፍን ቸርነት ፤ የኢትዮጵያ አትሌቲክስ ፌዴሬሽን ፕሬዚዳንት ምክትል ኮሚሽነር ደራርቱ ቱሉ ፤ የኢትዮጵያ አትሌቲክስ ፌዴሬሽን ፕሬዚዳንት ምክትል ፕሬዚዳንት አትሌት ገዛኸኝ አበራ ፤ የ2024 የፓሪስ ኦሎምፒክ የቴክኒክ ኮሚቴ ሰብሳቢ አቶ ቢልልኝ መቆያ ፤ የአዲስ አበባ አትሌቲክስ ፌዴሬሽን ፕሬዚዳንት አቶ ቢንያም ምሩፅን ጨምሮ በርካታ እንግዶች ተገኝተዋል ።

የማህበሩን ምስረታ አስመልክቶም የኢትዮጵያ አትሌቲክስ ብሔራዊ ቡድን ደጋፊዎች ማህበር መስራች እና ፕሬዚዳንት የሆኑት አቶ ምንያህል ጌታቸው ከሀትሪክ ስፖርት ድህረገፅ ጋር አጠር ያለ ቆይታ አድርገዋል ።

አቶ ምንያህል የማህበሩን መመስረት አላማ እንዲህ ገልፀውታል ። “ውጤት ሲመጣ ማንም ውጣ ሳይባል ሄዶ ይቀበላል ። ውጤት ሲጠፋ ደግሞ በዛው ልክ ወቀሳ ብቻ ይኖራል ። የማህበሩ መመስረት ለምንድነው ያስፈለገው ካልን ውጤት ቢመጣም ውጤት ቢጠፋም ፤ በህብረት በአንድነት ሆነን ፤ አንድ ላይ ቆመን በተቀናጀ መልኩ አቀባበል ለማድረግ ፤ ለረጅም ጊዜ የተረሱ አትሌቶች ከያሉበት ፈልገን ለማውጣት እና ለማገዝ ነው ። ስለዚህ ተደራጅተን አትሌቲክሱ ላይ ችግር እንኳን ቢፈጠር ወደ አደባባይ ከመውጣቱ በፊት እኛ መሀል ላይ ገብተን ጀግኖች የሮጡለትን ሰንደቅ አንጥፈን የማግባባት እና የማስማማት ስራ ነው የምንሰራው ። ”

እንደ ማህበሩ ፕሬዚዳንት አቶ ምንያህል ጌታቸው ገለፃ ማህበሩን ለመመስረት ከኦሪገኑ የአለም አትሌቲክስ ሻምፕዮና መልስ ከአትሌቲክስ ፌዴሬሽን ለኢትዮጵያ እግርኳስ ደጋፊዎች ማህበር በአቀባበሉ ወቅት ላደረጉት አስተዋጽኦ የተሰጣቸው ዕውቅና መነሻው ነበር ብለዋል ።

በመቀጠልም ስፖርቱ አካባቢ ያሉ ሰዎችን ፣ ባለሀብቶች ፣ የሙዚቃ ባለሙያዎች ፣ አርቲስቶች ፣ ጋዜጠኞች ፣ ስፖርቱ አካባቢ ያሉ የህግ ባለሙያዎች እና ሌሎችን በማካተት ማህበሩ መመስረቱን ተናግረዋል ።

ማህበሩ ከጥቂት ሳምንታት በኋላ በሚደረገው የቡዳፔስቱ 19ኛው የአለም አትሌቲክስ ሻምፕዮና ላይ አዲስ ነገር ይዘን እንደሚመጣም ፕሬዝዳንቱ ተናግረዋል ።

“በቅርቡ በሀንጋሪ ቡዳፔስት በሚደረገው የአለም አትሌቲክስ ሻምፕዮና ላይ ከዚህ ቀደም ባልተለመደ መልኩ አትሌቶቻችንን ከሆቴላቸው እስከ አየር መንገድ በማልያ እና በሰንደቅ አላማ አሸብርቀን ለመሸኘት ተዘጋጅተናል ። በማህበር ስትሆን እንደዚህ አይነት ጠንካራ ስራዎችን መስራት ትችላለክ ። ”

ይሀ ማህበር የተለያዩ ጥቅማጥቅሞች ለማግኘት ብቻ እንደተቋቋሙ ማህበራት የተቋቋመ አይደለም ሲሉም አቶ ምንያህል ያክላሉ ።
” ይህ ማህበር የተቋቋመው እርዳታ ለማግኘት ሳይሆን የአትሌቲክስ ፌዴሬሽንን ለማገዝ ነው የተቋቋመው ። አቅም ያላቸው ገንዘብ ያላቸው ዕውቀት ያላቸው ሰዎችንም ይዘን ነው ማህበሩን የመሰረትነው ። ”

በተያያዘም በግል ውድድሮች ላይ ክብረወሰኖችን በማሻሻል ለሚያሸንፉ አትሌቶችም ደማቅ አቀባበል በማድረግ እስከማረፊያቸው ለማድረስ ተዘጋጅተናል ብለዋል ።

ግንቦት 5 ሙሉ ዕውቅና አግኝቶ በትናንትናው ዕለት ወደ ስራ የገባው ማህበሩ 28 መስራች እና 47 አባላት በድምሩ 75 አባላትን ይዟል ።

ማህበሩ ገና ከምስረታው የተመሰረተበትን አላማ በሚገባ በሚያሳይ መልኩ ለተስፈኛ አትሌቶች እና ለአንጋፋ አትሌቶች ድጋፎችን አድርጓል ።

አቶ ምንያህል እንደገለፁት የአዲስ አበባ አትሌቲክስ ፌዴሬሽን ፕሬዚዳንት አቶ ቢንያም ምሩፅን በማማከር ለ20 የነገ ተስፋ ለሆኑ አትሌቶች ደረጃውን የጠበቀ የሙሉ ትጥቅ ድጋፍ ተደርጓል ።

በተጨማሪም ለአስር አንጋፋ አትሌቶች የ5 ሺህ ብር ስጦታ ፣ ቱታ እና የጫማ ድጋፍ አድርገናል ሲሉም አክለዋል ።

በዕለቱ መርሐግብር ለአትሌቲክሱ የአንበሳውን ድርሻ ለተወጡ በህይወት ለሌሉት የቀስተዳመና ባለቤት አቶ አቤሴሎም ፣ ለአቶ ጌታ ዘሩ እና ለአቶ ቢልልኝ መቆያ ማህበሩ ሽልማት አበርክቶላቸዋል።

ለአትሌቲክስ ፌዴሬሽን ፕሬዝዳንት ም/ኮሚሽን አትሌት ደራርቱ ቱሉ የማህበሩ ስራ አስፈፃሚዎች ስጦታ አበርክተዋል።

ማህበሩ የስራ አስፈፃሚ አባላትን የሰየመ ሲሆን ፕሬዚዳንት አቶ ምንያህል ጌታቸው ፤ ምክትል ፕሬዚዳንት የህግ ባለሙያ እና ጠበቃ አቶ ፍፁም ወልደጊዮርጊስ ፤
ዋና ፀሀፊ ተዋናይት እና ሞዴሊስት ወ/ሮ ሂሩት ማንያዘዋል እንዲሁም አቶ መሀመድ አሊ እና አቶ ክንፈ በሻ በስራ አስፈፃሚ ኮሚቴ ውስጥ ተካተዋል  ።